Die honn nix genn

Om Rosemondach hugg ich mit meina Frau gemietlich im Zimma. Uff ämol klingelt’s. Wie ich die Hausdier uffmache, schdehn do zwei vaweechene Geschdalde. Im Gesicht sinn se rot un braun vamoolt, on da Seit hat jeda e schwera Colt hänge. Der klänschd Faasebooz war vielleicht vier Johr alt, der onna siwwe. Ma hat direkt gesiehn, dass es Brieda ware, sie honn sich geglich gehutzt wie geschputzt. Sie singe:

„S is Faasenacht, s is Faasenacht, die Kiechelcha sinn gebaggt, eraus demit, eraus demit, mia schdeche se in de Sack.“

Der Klännschd hat’s noch nit so richdich gekinnt un denne Große beim Singe imma oongeguckt. Wie se ferdich ware, honn ich denne Klääne gefrood:

„Was sinna donn fier Booze?“

„Ei – ei, Faasebooze.“

„Ja“, saat ich, un schdelle mich e bissje dumm. „Bisch du e Reiwa odda e Prinzessin – odda was?“

„Ääh – Prinzessin!“ saat er vaächtlich un tuppt sich mim Finga on sei Schlääf. Ich war ihm zu tobisch.

„Mia sinn Kauboys,“ saat do der Äldschd.

„Kauboys“, echot der Klään.

„Wodroon mergt ma donn das?“

„Ei, mia schieße – un do.“ Er zei’t uff sei Kauboyhut.

„Mia schieße imma“, echot der Klään.

„Uff was schieße na donn?“

Der Groß: „Ei, wo ma nix grien gebbt geschuss.“

Der Klään: „Do gebbt geschuss.“

„Au, do muß ich eich jo dabba ebbes genn, Awwa, was mach ich jetzt bloß, mia honn ga kä Faasekiechelcha im Haus.

Do saat der Älschd: „Mia holle ach onneres.“

„Holle na ach Geld?“

„Nodierlich, das is es Beschde.“

Ich halle dem Groß e Geldschdigg hin, dem Klään a Tafel Schoklad.

„Uwe, holl die Schnäägestasch!“ saat der Äldschd un losst das Geld, „es Beschde“, wie a saat, imme Leddabeidel vaschwinne. Der klään Kauboy hollt e Leinebeidel von da Schulla un vaschdaud de Schoklad in da „Schnäägestasch“.

Großer Kauboy: „Danke!“

Klääna Kauboy: „Danke!“

Die zwei mache kehrt un ziehe die Brick.

Eh se um die Hauseck gehn, schießt der Groß schrääch geeniwwa uff e Haus. Er dräht sich rum un saat, damit ich die Sach begreife: „Die honn nix genn, die sinn se kniggich!“

newslinks

Mundarttexte der Bosener Gruppe

+++