05_2

Mundart im Saarland

Völklinger Platt 2005

Mosel- und rheinfränkischer Mundartwettbewerb 2005

2. Preis

Norbert Schneider
Bergstr. 43
55592 Rehborn

De eiseharde Ausbutzer....

Em Thomas sei Oba war vor ääm Johr gestorb unn jetz, wo de
Grabstää gesetzt war, sollt doch aach es Grab gemach werre.
Do wollt do Thomas unbedingt methelfe, weil er sich met seim
Oba immer gut vestann hatt. Jede Daach hatt der sich bei
seim Enggelche erkunnicht, wie`s in de Schul gelääf war unn
de Thomas hatt om Oba seine Libbe gehonk bei dem seine
Vezehlcher vun de Arwet uff de Hitt. Vor allem iwwer Fußball
harre die zwää als richdiche Experdegespreecher gefehrt. De
Thomas war eerscht zwelf, awwer er hot sich ausgekennt wie
e Alder. Nää, do hot em kääner ebbes vormache kenne.
Die Mudder hot jetz vorm Grab gestann unn hot e paar Mol
vesucht, die Planze in Reihe se setze. Awwer es hot ehr ää-
fach nit gefall unn es sollt doch schee aussieh uff em Oba
seim Grab. De Thomas hot e Zeitlang zugeguckt, dann saarer:
“Du, Mama, stell der mol vor, em Oba sei Grab wär e Fußball-
feld. Das Flache do newe anne“ – es war de Efei – „das sein
die Zuschauer. Das große Griene“ – es war e Farn – „hogge
mer vor de Stää, das ess de Dormann. Unn das wo rosa blieht“
- es ware nei Eriga-Steggelcher – „setze mer wie e Fußball-
mannschaft. Do hummer jetz die Wahl: Wammer die Auswärts-
uffstellung nemme, mache mer es Middelfeld sterk, wammer
e Häämspeel hunn, speele mer met drei Spitze!“ Unn dodebei
horrer die Planze de jeweilich Uffstellung noo hiegeleet.
Die Mudder konnt nix dezu saan unn wie de Thomas dann die
eise Grablamp zwische dene Dormann-Farn unn die hinnerschde
Veteidicher-Eriga gestellt hot unn saat: „Unn dasdoo ess de
Oba, weil der immer vezehlt hot, er wär frieer e eiseharder
Ausbutzer geweescht, neegscht so hart wie das Eise uff de
Hitt!“, do hot die Mudder em Thomas iwwer de Kopp gestrech
unn um ehr Aaue erum hot`s e bissje nass geschimmert...